કોરોના મહામારીના કારણે વૈશ્વિક અર્થતંત્ર ખોરવાયું છે. ઘણી મોટી કંપનીઓએ તેમની ઓફિસો બંધ કરીને કર્મચારીઓને વર્ક ફ્રોમ હોમની સુવિધા આપવી પડી. અમેરિકાની દિગ્ગજ ટેક કંપનીઓ ફેસબુક અને ગૂગલે પણ મહામારીના શરૂના દિવસોમાં જ તેમના મોટા ભાગના કર્મચારીઓને વર્ક ફ્રોમ હોમ કરવા કહ્યું. હવે લૉકડાઉનમાં છૂટ અપાઇ રહી છે તો કંપનીઓની ઓફિસો ખૂલવાનું પણ શરૂ થઇ ગયું છે. ગૂગલ અને ફેસબુક પણ જુલાઇમાં પોતાની ઓફિસો ખોલી રહી છે. જોકે, બંને કંપનીઓએ એમ પણ કહ્યું છે કે તેમના જે કર્મચારીઓ હાલ વર્ક ફ્રોમ હોમ કરી રહ્યા છે તેમને ચાલુ વર્ષના અંત સુધી આ સુવિધા મળતી રહેશે.
જે કર્મચારીઓને ઓફિસે આવવાની જરૂર છે તેઓ જુલાઇથી આવી શકશે
ગૂગલે અગાઉ એમ કહ્યું હતું કે તેની વર્ક ફ્રોમ હોમ પોલિસી 1 જૂન સુધી લાગુ રહેશે પણ હવે તેણે આ પોલિસી વધુ 7 મહિના માટે લંબાવી છે જ્યારે ફેસબુકે કહ્યું છે કે તેની ઓફિસો 6 જુલાઇએ ખૂલી જશે પણ કર્મચારીઓ ડિસેમ્બરના અંત સુધી વર્ક ફ્રોમ હોમ કરતા રહેશે. ગૂગલના સીઇઓ સુંદર પિચાઇએ કહ્યું કે જે કર્મચારીઓને ઓફિસે આવવાની જરૂર છે તેઓ જુલાઇથી આવી શકશે. તે માટે ગૂગલે દુનિયાભરમાં આવેલી તેની ઓફિસોમાં સુરક્ષા માપદંડ વધાર્યા છે, જેથી કર્મચારીઓને સંક્રમણથી બચાવી શકાય.
કર્મચારીઓ ઘરેથી વર્ષના અંત સુધી કામ કરી શકશે
પિચાઇએ એમ પણ કહ્યું કે ઘરેથી કામ કરતા મોટા ભાગના કર્મચારીઓ ચાલુ વર્ષના અંત સુધી તેમ કરી શકશે. ફેસબુકનું વલણ પણ ગૂગલ જેવું જ છે. ફેસબુકના પ્રવક્તાએ કહ્યું કે જે કર્મચારીઓ ઘરેથી કામ કરવાનું ચાલુ રાખી શકે તેમ છે તેઓ વર્ષના અંત સુધી આ સુવિધા મેળવી શકશે. સ્થિતિ સતત બદલાઇ રહી છે. ફેસબુક હાલ એ નક્કી કરી રહી છે કે કયા કર્મચારીઓને ઓફિસે આવવાનું કહેવામાં આવે?
ફેસબુકે 75 હજાર રૂપિયા બોનસ પણ આપ્યું હતું
ફેસબુકે ઘરેથી કામ કરતા કર્મચારીઓને ઘરે વર્ક સ્ટેશન તૈયાર કરવા અને બાળકોની સારસંભાળ માટે 1 હજાર ડોલર (અંદાજે 75 હજાર રૂ.) બોનસ પણ આપ્યું હતું. કોરોના મહામારીને ધ્યાનમાં રાખીને ભારત સહિત દુનિયાભરની ઘણી કંપનીઓ પોતાના વર્ક કલ્ચર અંગે ગંભીરતાથી વિચારી રહી છે. ટીસીએસ, ઇન્ફોસિસ અને એચસીએલ જેવી ભારતીય કંપનીઓએ પણ કહ્યું છે કે કોરોનાનું સંકટ દૂર થયા પછી પણ તેઓ વર્ક ફ્રોમ હોમને પ્રોત્સાહન આપવાનું ચાલુ રાખશે.
Download Dainik Bhaskar App to read Latest Hindi News Today
from Divya Bhaskar https://ift.tt/2zoGFno
No comments:
Post a Comment