Allindianews: રાજ્યભરમાં હળ‌વા વરસાદની વકી, કાંઠા વિસ્તારોમાં હળવાથી ભારે વરસાદ થશે

Sunday, May 31, 2020

રાજ્યભરમાં હળ‌વા વરસાદની વકી, કાંઠા વિસ્તારોમાં હળવાથી ભારે વરસાદ થશે

દક્ષિણ ગુજરાત અને સૌરાષ્ટ્રના કાંઠા વિસ્તારોમાં ત્રીજી જૂને 80થી 120 કિમી પ્રતિ કલાકની ઝડપે તેજ પવન સાથે વાવાઝોડું ત્રાટકવાની સંભાવના છે. અરબ મહાસાગરમાં સર્જાયેલું લો-પ્રેશર આગામી 48 કલાકમાં મજબૂત બનીને 3થી 4 જૂનની આસપાસ દેશની ઉત્તર દિશામાં આગળ વધીને ઉત્તર મહારાષ્ટ્ર અને દક્ષિણ ગુજરાત-સૌરાષ્ટ્રનાં દરિયાકાંઠે લેન્ડફોલ કરશે એવી હવામાન વિભાગની આગાહી છે. જેમ જેમ આ સિસ્ટમ નજીક આવશે તેમ તેમ રાજ્યમાં પ્રિ-મોનસૂન ગતિવિધિઓ સક્રિય થતાં રાજ્યના મોટાભાગના વિસ્તારોમાં પ્રિ-મોનસૂન એક્ટિવિટીના ભાગરૂપે વરસાદી ઝાપટા કે હળવો વરસાદ શરુ થવાની વકી હવામાન વિશેષજ્ઞે કરી છે.
દક્ષિણ-પૂર્વ તેમજ પૂર્વ-મધ્ય અરબ સાગરની આસપાસ લો-પ્રેશર
હવામાન વિશેષજ્ઞ અંકિત પટેલ જણાવે છે કે, લક્ષદ્વીપમાં સક્રીય થયેલાં અપર એર સાયક્લોનિક સરક્યુલેશનની અસરથી દક્ષિણ-પૂર્વ તેમજ પૂર્વ-મધ્ય અરબ સાગરની આસપાસ લો-પ્રેશર રચાયું છે, આ લો-પ્રેશર આગામી 24 કલાકમાં ડિપ્રેશનમાં અને ત્યારબાદના 24 કલાકમાં ટ્રોપીકલ સાયક્લોનિક સ્ટોર્મમાં ફેરવાઇને લગભગ દેશના ઉત્તરમાં ગતિ કરીને તા. 3 જૂન આસપાસ ઉત્તર મહારાષ્ટ્ર તેમજ દક્ષિણ ગુજરાત અને સૌરાષ્ટ્રના દરિયાકાંઠા નજીક પહોંચશે. આંતરરાષ્ટ્રીય એજન્સી JTWC આ સિસ્ટમને 93 A INVEST નામ સાથે ટ્રેક કરી રહી છે, જેનું સવારમાં 5:30 વાગ્યે લોકેશન 10.4 ઉત્તર અને 72.2 પૂર્વમાં છે, સિસ્ટમ સાથે સંકળાયેલા વાદળોનો જથ્થો સિસ્ટમના કેન્દ્રથી ઉત્તર દિશામાં રહેલો છે.
વાવાઝોડા વિશે તમારા દરેક સવાલના જવાબ
સવાલ: ગુજરાતમાં વાવાઝોડું કયા ટકરાશે?
જવાબ: આગામી 24-48 કલાકમાં સ્પષ્ટ થશે. દક્ષિણ ગુજરાત પર સૌથી વધારે અસરની શક્યતા છે.
સવાલ: કઈ ગતિએ ત્રાટકવાના શક્યતા?
જવાબ: 80-120 કિમની ઝડપે પવન ફૂંકાશે.
સવાલ: વાવાઝોડની ચોમાસા પર શું અસર?
જવાબ: હાલના અંદાજે તેની ચોમાસા પર કોઈ નકારાત્મક અસર નહીં પડે.
સવાલ: કયા વિસ્તારોમાં વરસાદ શક્ય?
જવાબ: વાપી, વલસાડ તથા સૌરાષ્ટ્રના કાંઠા વિસ્તારોમાં વરસાદ શક્ય.
રાજ્ય માટે આગામી 48 કલાક મહત્ત્વના
હાલ સિસ્ટમના ચોક્કસ લેન્ડફોલ સ્થળ બાબતે વૈશ્વિક ટોપ મોડેલોમાં મત-મતાંતર છે. ચોક્કસ ‘લેન્ડફોલ સ્થળ’જાણવા માટે 24થી 48 કલાક રાહ જોવી પડશે.

એજન્સી	ક્યાં ત્રાટકશે	સમય- તારીખ
યુરોપિયન	વલસાડ- નવસારી	3:30 કલાકે 3 જૂન
ઈંગ્લેન્ડ	ઉત્તર કોંકણ કોસ્ટ	વહેલી સવારે 4 જૂન
અમેરિકા	કોંકણ, વસઇ-મુંબઇ	9.30 કલાકે 3 જૂન
જર્મની	વલસાડ-નવસારી	સવારે 11.30 કલાકે 4 જૂન
ભારતનું IMD	સુરત-વાપીનાં દરિયાકાંઠે	વહેલી સવારે 4 જૂન