કોરોના મહામારીએ ન્યાયતંત્રને પણ કામ કરવાની પદ્ધતિની સાથોસાથ ડ્રેસ કોડ બદલવા મજબૂર કરી છે. દેશની સુપ્રીમકોર્ટના ઇતિહાસમાં બુધવારે એ સમયે નવો અધ્યાય ઉમેરાયો કે જ્યારે પહેલી વાર જજીસે ગાઉન, જેકેટ અને કોટ પહેર્યા વિના કેસોની સુનાવણી કરી. ચીફ જસ્ટિસ શરદ બોબડેએ કહ્યું કે કોરોના કટોકટી રહે ત્યાં સુધી જજીસ અને વકીલો માટે નવા ડ્રેસ કોડનો આદેશ જલદી જારી કરીશું.
વીડિયો કોન્ફરન્સિંગ દ્વારા સુનાવણી બાદ સુપ્રીમકોર્ટમાં વધુ એક મોટો ફેરફાર
વૉટ્સઍપ પેમેન્ટ સર્વિસ સંપૂર્ણપણે બંધ કરવા અંગેના એક કેસ મામલે બુધવારે સુપ્રીમકોર્ટમાં વીડિયો કોન્ફરન્સિંગ દ્વારા સુનાવણી ચાલી રહી હતી. ચીફ જસ્ટિસ બોબડે અને સાથી જજ ઋષિકેશ રાયએ જેકેટ, કોટ અને ગાઉન વિના માત્ર સફેદ શર્ટ અને નેક બેન્ડ પહેર્યા હતા. અરજદારના વકીલ કપિલ સિબ્બલે તેમને પૂછી લીધું કે બેન્ચે ગાઉન કેમ નથી પહેર્યું?
માત્ર સફેદ શર્ટ અને બેન્ડ પહેરીને સુનાવણી કરી
ચીફ જસ્ટિસ બોબડેએ કહ્યું કે તેમણે કોરોનાના સંક્રમણથી બચાવ અંગે ડૉક્ટર્સ અને નિષ્ણાતોનો અભિપ્રાય માગ્યો હતો, જેમના કહેવા મુજબ ભારે અને ખુલતા કપડાંથી કોરોના સરળતાથી ફેલાય છે. તે અંગે વિચારીને અમે માત્ર સફેદ શર્ટ અને બેન્ડ પહેરીને સુનાવણી કરી રહ્યા છીએ. અમે વકીલો માટે પણ આ સંદર્ભમાં વિચારી રહ્યા છીએ. ત્યાર બાદ અન્ય એક કેસની સુનાવણી દરમિયાન સોલિસિટર જનરલ તુષાર મહેતા પણ જજીસનું અનુકરણ કરીને સફેદ શર્ટ અને બેન્ડમાં દેખાયા. નોંધનીય છે કે દેશ આઝાદ થયા બાદ પહેલી વાર ન્યાયતંત્રમાં આવો ફેરફાર થઇ રહ્યો છે. સુપ્રીમકોર્ટના પૂર્વ જસ્ટિસ બી. એસ. ચૌહાણના કહેવા મુજબ, બંધારણમાં જોગવાઇ છે કે અસામાન્ય પરિસ્થિતિમાં કે ડૉક્ટરની સલાહથી ડ્રેસ કોડમાં છૂટ આપી શકાય છે.
અધિકારીઓ, કર્મચારીઓને એપ્રિલમાં જ ડ્રેસ કોડથી રાહત મળી ચૂકી છે
સુપ્રીમકોર્ટ તેના કર્મચારીઓ, અધિકારીઓને ડ્રેસ કોડથી પહેલેથી જ રાહત આપી ચૂકી છે. 24 એપ્રિલે જારી આંતરિક પરિપત્રમાં જણાવાયું હતું કે નિષ્ણાતોના મતે કોરોના સંક્રમણ રોકવા રોજ ધોયેલા કપડાં પહેરવા જોઇએ. કોટ-ટાઇ રોજ ધોઇ શકાય નહીં, જેથી આગામી આદેશ સુધી તમામ અધિકારીઓ, કર્મચારીઓ કોટ-ટાઇ વિના ફરજ પર આવી શકશે.
Download Dainik Bhaskar App to read Latest Hindi News Today
from Divya Bhaskar https://ift.tt/3fIjaqe
No comments:
Post a Comment