લદાખની ગલવાન ઘાટીમાં ચીની સૈનિકો સાથે થયેલી હિંસક અથડામણ પછી રાખડી અને તેના સંબંધિત સામાનની આયાતને અસર થઈ છે. વેપારીઓએ વિવાદ પહેલા લગભગ 70 ટકા આયાત કરી દીધી હતી. પરંતુ ત્યારપછી નવા ઓર્ડર આપવાનું બંધ કરી દીધું છે. એને કારણે ચીનને લગભગ 400 કરોડ રૂપિયાનું નુકસાન થયું છે.
કોન્ફેડરેશન ઓફ ઓલ ઈન્ડિયા ટ્રેડર્સના અધ્યક્ષ બી.સી.ભરતિયા કહે છે કે બીજા તહેવારોમાં પણ ચીનથી આયાત ઓછી થશે. દિવાળી પર તેની સૌથી વધુ અસર જોવા મળશે. ગયા વર્ષે દિવાળીએ 3200 કરોડ રૂપિયાના સામાનની આયાત કરાઈ હતી. જ્યારે 2018માં 8 હજાર કરોડ રૂપિયાનો સામાન મંગાવાયો હતો. 3 ઓગસ્ટે રક્ષાબંધન છે. એ નિમિત્તે દેશી દોરાની રાખડીઓની માંગ વધુ રહે છે. આ કારણે ચીનથી આવતી ફેન્સી રાખડીઓની માંગ ઓછી થઈ ગઈ છે. બદલાતા ટ્રેન્ડ વચ્ચે ગ્રાહકો પણ હવે ચીનના સામાનને નકારી રહ્યા છે. રાખડીમાં વપરાતા સજાવટના સામાન ફોમ, સ્ટોન વગેરે ચીનથી આયાત થાય છે. તેની કિંમત લગભગ 1200 કરોડ રૂપિયા સુધી હોય છે. દેશમાં રાખડીનો વેપાર 5થી 6 હજાર કરોડ રૂપિયાનો છે. જે આ વર્ષે ઘટીને 2500 કરોડનો થઈ જશે. દેશમાં સૌથી વધુ રાખડી પશ્ચિમ બંગાળમાં બને છે.
આ ઉપરાંત દિલ્હી, મુંબઈ અને ગુજરાતમાં પણ મોટાપાયે રાખડી બને છે. બંગાળના રાખડી ઉત્પાદક રોહિત ગુપ્તા કહે છે કે રાખડીનો ઓર્ડર ગયા વર્ષ કરતાં 50 ટકા ઓછો છે. પરંતુ કારીગરો પર તેની કોઈ અસર પડી નથી. તેમને ગયા વર્ષે જેટલું કામ મળ્યું હતું એટલું મળી રહ્યું છે. કોરોના પછી વધેલી માંગનો સૌથી વધુ ફાયદો સ્થાનિક કારીગરોને મળ્યો છે. કોલકાતાના વેપારી કે.સી.મુખરજી કહે છે કે માંગ ઘટી છે. પરંતુ આયાત પણ ઓછી થઈ છે. માંગ ઓછી થતાં રાખડી કારીગરોને ઘણું ઓછું કામ મળે છે.
ફોન પર ઓર્ડર બુકિંગ, પબજી, એવેન્જર રાખડીની કિંમત 5થી 18 રૂપિયા
લૉકડાઉન અને ભાડામાં વધારાને કારણે રાખડીની કિંમતમાં 10થી 15 ટકાનો ઉછાળો આવ્યો છે. દિલ્હીના સદર બજારમાં 1 રૂપિયાથી લઈ 70 રૂપિયા સુધીની રાખડી વેચાય છે. બાળકો માટે પબજી, એવેન્જર રાખડીનો ભાવ 5થી 15 રૂપિયા છે. કાર્ટૂન બ્રાન્ડ મોટુપતલુની રાખડી 3થી 10 રૂપિયા, મેટેલિક રાખડી 180થી 300 રૂપિયે ડઝન અને એન્ટિક રાખડી 600થી 700 રૂપિયા ડઝનના ભાવે મળે છે. ઓર્ડર ફોન પર લેવાય છે.
Download Dainik Bhaskar App to read Latest Hindi News Today
from Divya Bhaskar https://ift.tt/3eE5fQl
No comments:
Post a Comment