ભારતે 7500 કિલોમીટરની ઝડપે પ્રહાર કરી શકતી મિસાઈલ ટેકનોલોજીનું પરીક્ષણ કર્યું

(પીટીઆઈ) નવી દિલ્હી, તા. 7 સપ્ટેમ્બર, 2020, સોમવાર

ભારતે આજે હાયપરસોનિક ટેકનોલોજી ડેમોન્સ્ટ્રેશન વ્હિકલ (એચટીડીવી)નું સફળ પરીક્ષણ કર્યંત હતું. કોઈ વાહન અવાજની ઝડપ (કલાકના 1238 કિલોમીટર) કરતાં પાંચ ગણી વધારે ઝડપે પ્રવાસ કરે તો તેને હાઈપરસોનિક સ્પીડ કહેવામાં આવે છે. 

ભારતના એચટીડીવીએ પરીક્ષણ દરમિયાન અવાજ કરતા છ ગણી વધારે એટલે કે અંદાજે 7500 કિલોમીટર પ્રતિકલાકની ઝડપ હાંસલ કરી હતી. હાઈપરસોનિક સ્પીડ ધરાવતા જગતના ચાર દેશોમાં ભારતનો સમાવેશ થયો છે. અગાઉ મિસાઈલ્સ માટે અમેરિકા, રશિયા અને ચીન હાઈપરસોનિક સ્પીડ હાંસલ કરી ચૂક્યા છે.

આ ટેકનોલોજી ભારતના ડિફેન્સ રિસર્ચ એન્ડ ડેવલપમેન્ટ ઓર્ગેનાઈઝેશન (ડીઆરડીઓ) દ્વારા તૈયાર કરવામાં આવી હતી. અત્યારે માત્ર હાઈપરસોનિક વ્હિકલનું પરીક્ષણ થયું છે, હવે એ વ્હિકલમાં સવાર થઈ શકે એવું મિસાઈલ પણ તૈયાર થઈ શકશે. ભારત એ પછી હાઈપરસોનિક મિસાઈલ તૈયાર કરી શકશે.

કલાકના 7500 કિલોમીટરની ઝડપે ધારો કે દિલ્હીથી પ્રહાર કરવામાં આવે તો ચીનના પાટનગર બિજીંગ પહોંચતા માંડ 30 મિનિટ અને પાકિસ્તાનના પાટનગર ઈસ્લામાબાદ પહોંચતા 10 મિનિટ થાય. નિષ્ણાતોના કહેવા પ્રમાણે ટેકનોલોજીમાં સફળતા મળ્યાં પછી ભારત આગામી પાંચ વર્ષમાં હાઈપરસોનિક મિસાઈલ તૈયાર કરી શકે છે.

આ સફળતા સાથે હાઈપરસોનિક ઝડપે આકાશમાં મેનુવરિંગ (આમ-તેમ વળાંક વળવા), સ્ક્રેમજેટ એન્જિન ટેકનોલોજી, બળતણની ક્ષમતા, વ્હિકલની દિશા અને ક્ષમતા વગેરે પ્રકારના માપદંડો પણ માપવામાં આવ્યા હતા અને એ બધામાં સફળતા મળી હતી. વિવિધ રેડાર દ્વારા આ એચટીડીવીનું ટ્રેકિંગ કરવામાં આવ્યું હતું.

આ પરીક્ષણ લગભગ પાંચેક મિનિટ ચાલ્યું હતું.  ડીઆરડીઓ દ્વારા ઓડિશાના અબ્દુલ કલામ ટાપુ પર સવારે એચટીડીવીનું પરીક્ષણ કર્યું હતું. વ્હિકલના પરીક્ષણ માટે અગ્નિ મિસાઈલના બુસ્ટરનો ઉપયોગ કરવામાં આવ્યો હતો. આ સફળતા પછી વડા પ્રધાન, સંરક્ષણ મંત્રી વગેરેએ ડીઆરડીઓને અભિનંદન આપ્યા હતા. સંરક્ષણ મંત્રીએ આ સિદ્ધિને આત્મનિર્ભર ભારતની આગેકૂચ ગણાવી હતી.

હાઈપરસોનિક મિસાઈલ : અદૃશ્ય ઓઝાર

અમેરિકા, રશિયા અને ચીન ત્રણેય પોતપોતાની રીતે એવા દાવા કરી ચૂક્યા છે કે તેમની પાસે હાઈપરસોનિક મિસાઈલો છે. પણ આ હથિયારો ચીંથરે ઢાંક્યા રતન જેવા છે, તેમને સામાન્ય રીતે અદૃશ્ય રાખવામાં આવે છે. ડિસેમ્બર 2019માં રશિયાએ દાવો કર્યો હતો કે અમે જગતનું પ્રથમ હાઈપરસોનિક મિસાઈલ તૈયાર કરી લીધું છે અને તેની ઝડપ કલાકના 11 હજાર કિલોમીટર છે. એ દાવા વખતે પુતિને કહ્યું હતું કે અમેરિકાને અમે પાછળ રાખી દીધું છે. બીજી તરફ હમણાં જુલાઈ-2020માં જ અમેરિકાએ કલાકના 21 હજાર કિલોમીટરની અસાધારણ ઝડપે પ્રહાર કરી શકતા હાઈપરસોનિક મિસાઈલનું પરીક્ષણ કર્યાના અહેવાલ આવ્યા હતા. ચીન પણ અગાઉ આ ટેકનોલોજીનું પરીક્ષણ કરી ચૂક્યું છે, પરંતુ કોઈ દેશ તેની વધારે વિગતો જાહેર કરતો નથી.

from Top Stories News - Gujarat Samachar : World's Leading Gujarati Newspaper https://ift.tt/329Ewbr