ચંબલ નદીના કાંઠે વસેલું કોટા શહેર અનલૉક તો થઇ ગયું છે પણ સન્નાટો છવાયેલો છે, કેમ કે શહેરની રોનક સમાન અહીં ભણતા દોઢ લાખ વિદ્યાર્થી ઘરે જતા રહ્યા છે. તેમાં આસપાસના જિલ્લાના 6-7 હજાર વિદ્યાર્થી પણ સામેલ છે. ‘નીટ’ની તૈયારી કરી રહેલા માત્ર 2 હજાર વિદ્યાર્થી હાલ અહીં બચ્યા છે. તેમાંથી કેટલાક પરિવારજનોની સાથે છે તો કેટલાક એકલા. દર વર્ષે 1.60 લાખ વિદ્યાર્થી અહીં નીટ અને જેઇઇની તૈયારી કરવા આવે છે. એક વિદ્યાર્થીની સરેરાશ ફી એક લાખથી સવા લાખ રૂ. છે. રહેવા-જમવાનો અંદાજે 1 લાખ રૂ. ખર્ચ થાય છે. કોટામાં કોચિંગ ઇન્ડસ્ટ્રી વાર્ષિક 300 કરોડ રૂ.ની છે. અનલૉક બાદ કોચિંગ સેન્ટર્સના 2,500 શિક્ષક અંદાજે 70 હજાર વિદ્યાર્થીને ઓનલાઇન ભણાવી રહ્યા છે. વિદ્યાર્થીઓ ઘરે જતા રહેતાં 1,500 હોસ્ટેલ, 3 હજાર મેસ હાલ બંધ જ હોવાથી ત્યાં કામ કરતા 10 હજાર લોકો હાલ બેકાર થઇ ગયા છે.
એક મોટી ઇન્સ્ટિટ્યૂટના પ્રતિનિધિ નીતેશ શર્મા જણાવે છે કે લૉકડાઉનમાં અમે ટીમો ઉતારી. વિદ્યાર્થીઓને ભોજન-નાસ્તો પણ આપ્યા. તંત્ર સાથે મળીને તમામ કોચિંગ સેન્ટર્સએ 50 હજાર વિદ્યાર્થીઓને ઘરે પહોંચાડ્યા. બધાનું ચેકઅપ કરાવાયું, સેનિટાઇઝર-માસ્ક પણ અપાયાં પણ કોઇને કોરોના ન થવા દીધો. જે વિદ્યાર્થીઓને ઓનલાઇન ભણવામાં તકલીફ પડતી હોય તેમને સ્ટડી મટીરિયલની હાર્ડ કોપી મોકલીએ છીએ. ફરી કોચિંગ શરૂ કરવા અંગે તંત્રને પ્રસ્તાવ મોકલ્યો છે કે અમે 50 ટકા ક્ષમતા અને ડિસ્ટન્સિંગ સાથે વિદ્યાર્થીઓને બેસાડીશું, પરંતુ અમને મંજૂરી નથી મળી.
પપ્પા-મમ્મી બંને બીમાર છે પરંતુ મારી પણ પૂરી તૈયારી છે, પરીક્ષા આપવા જઇશ
મારું નીટનું સેન્ટર હૈદરાબાદમાં છે. 7 જૂનનું રિઝર્વેશન હતું પણ 6 જૂને જ પપ્પા કોરોના પોઝિટિવ થઇ ગયા. તેઓ હૈદરાબાદની હોસ્પિટલમાં છે. હવે ફરી રિઝર્વેશન કરાવ્યું છે, એકલી પરીક્ષા આપવા જઇશ. મમ્મીને મહિના અગાઉ બ્રેઇન સ્ટ્રોક આવ્યો હતો. તેઓ હાલ કોલકાતામાં નાનાજીને ત્યાં છે. 6 માળની હોસ્ટેલમાં હાલ હું અને વોર્ડન સુનીતા આન્ટી જ છીએ. તેઓ મારું બહુ ધ્યાન રાખે છે. અભ્યાસમાં પણ મદદ કરે છે.
પપ્પા બહેરીનમાં, મમ્મી મારી સાથે, લૉકડાઉનમાં સૌથી સુરક્ષિત જગ્યા આ જ લાગી
પપ્પા બહેરીનમાં એરોનોટિકલ એન્જિનિયર છે. હું ધોરણ-10 સુધી ત્યાં જ ભણી. ગત 20 જૂને અહીં આવી હતી. ઘર કરતાં અહીં સારું લાગે છે. મને લાગે છે કે અભ્યાસ બરાબર થતો હોય તો કોઇ તકલીફ નથી. મમ્મી સાથે રહે છે. બહેને એનઆઇટી, અલ્હાબાદથી એન્જિનિયરિંગ કર્યું છે. તે હવે આઇઆઇએમમાં જવા માગે છે, જેથી ઇન્દોરમાં તૈયારી કરી રહી છે. લૉકડાઉનમાં મને તો આ જ સૌથી સુરક્ષિત જગ્યા લાગી.
બહેનને બ્રેઈન ટ્યૂમર થયું, પરિવારે કહ્યું- તું ચિંતા કર્યા વિના ત્યાં જ રહે, અભ્યાસ કર
હું પટણાના બક્સરની છું. મારી બહેનને બ્રેઈન ટ્યૂમર હોવાની થોડા દિવસ અગાઉ ખબર પડી. મમ્મી-પપ્પા તમિલનાડુના વેલ્લોરમાં તેની સારવાર કરાવે છે. અમે તણાવમાં છીએ. માતા પિતા કહે છે કે, તું ચિંતા ન કરીશ, કોટામાં જ રહીને અભ્યાસ કર. તેથી લૉકડાઉન પહેલાંથી અહીં જ છું. અહીં રહીને ભણે છે તેમની તૈયારી સારી છે. બહેનની ચિંતા તો થાય છે પણ મમ્મી-પપ્પા તેની સાથે છે એટલે ઝાઝી ચિંતા નથી થતી.
ઘરે ગઇ હતી પણ સંબંધીઓ આવી ગયા તો 3 સહેલી સાથે પાછી આવતી રહી
હું ટોન્કની છું. લૉકડાઉનમાં ઘરે ગઇ હતી. ત્યાં કોરોનાના કેટલાક કેસ આવ્યા હતા. ઘરે સંબંધીઓ પણ આવ્યા હતા. ઘરમાં માણસો વધી ન જાય એટલે 3 સહેલી સાથે પાછી આવી ગઇ. 26 જુલાઇએ પરીક્ષા છે. તેની તૈયારી કરી રહી છું. અહીં કોઇ તકલીફ નથી. નાસ્તો, લંચ, ડિનર બધું સમયસર મળે છે. પહેલાં અહીં પણ ભીડ હતી પણ હવે શાંતિ છે, જેથી સારી રીતે અભ્યાસ થઇ શકે છે.
Download Dainik Bhaskar App to read Latest Hindi News Today
from Divya Bhaskar https://ift.tt/2UYosoH
No comments:
Post a Comment